Monday, July 03, 2006

إشتياق

الزيف فى كل مكان
الزيف ملا الأركان وفاض
الزيف بيتباع علنى فى الدكاكين
معشش فى حمى الدواوين
طالل من السحنات ف بسمات صفرا
الزيف فى كاس النبيت
أحمر بلون الدما
ممصوصة م الفقرا
الزيف فى كلمة خانعة ممطوطة
’’ياسعادة البيه‘‘
فى رنَة الفضة على رخامة
وف زحمة الأسواق

الزيف فى أى مكان
الزيف فى كل مكان
***
وإنتى على البر واقفة
يم الأيادى العفية
يم النهود السخية
وام العيال سمرة بلون النيل
وام البنات حلوة ياعين ياليل
وعنيكى نبع الحنان
***
إرمى حبال الأمان دا البحر عالى الطوف
مدى الأيادى وعدَى من جبال الخوف
خلى النهار ربَان
غنى يا للى أمان
***
والله زمان يامصر
تشَقى توب القهر
وتستحمى بمية المحاياه
وتطلعى للعلالى
راكبة اغلى مهر
لجلن توَفى الندر
وولادك المغاووير على بابك
بينازلوا غصَابك
ويحلبوا م الليلى
ليكى أحلى نصر
***

والله زمان يا مصر

3 comments:

Bassma said...

حلوه اوي .. بجد عجبتني

بنتاؤور said...

اشكرك يا باسمة على رقتك وأهنيكى على إختيارك

o.nofal said...

بجد حلوة أوي
تسلم إيديك