Friday, July 09, 2010

من أشعار الفاجومى


يا شعبي حبيبي يا روحي يا بيبي

يا حاطك في جيبي يا بن الحلال

يا شعبي يا شاطر يا جابر خواطر

يا ساكن مقابر وصابر وعال

يا واكل سمومك يا بايع هدومك

يا حامل همومك وشايل جبال

يا شعبي اللي نايم وسارح وهايم

وفي الفقر عايم وحاله ده حال

احبك محشش مفرفش مطنش

ودايخ مدروخ وآخر انسطال

احبك مكبر دماغك مخدر

ممشي امورك كده باتكال

واحب اللي ينصب واحب اللي يكدب

واحب اللي ينهب ويسرق تلال

واحب اللي شايف وعارف وخايف

وبالع لسانه وكاتم ماقال

واحب اللي قافل عيونه المغفل

واحب البهايم واحب البغال
واحب اللي راضي واحب اللي فاضي

واحب اللي عايز يربي العيال

واحب اللي يائس واحب اللي بائس

واحب اللي محبط وشايف محال

واحبك تسافر وتبعد تهاجر

وتبعت فلوسك دولار أو ريال

واحبك تطبل تهلل تهبل

عشان ماتش كوره وفيلم ومقال

واحبك تأيد تعضض تمجد

توافق تنافق وتلحس نعال

تحضر نشادر تجمع كوادر

تلمع تقمع تظبط مجال

لكن لو تفكر تخطط تقرر

تشغلي مخك وتفتح جدال

وتبدأ تشاكل وتعمل مشاكل

وتنكش مسائل وتسأل سؤال

وعايز تنور وعايز تطور

وتعمللي روحك مفرد رجال

ساعتها حجيبك لايمكن أسيبك

وراح تبقى عبره وتصبح مثال

حبهدل جنابك واذل اللي جابك

وحيكون عذابك ده فوق الاحتمال

وامرمط سعادتك واهزأ سيادتك

واخلي كرامتك في حالة هزال

وتلبس قضيه وتصبح رزيه

وباقي حياتك تعيش في انعزال

حتقبل ححبك حترفض حلبك

حتطلع حتنزل حجيبلك جمااااال

3 comments:

forex team said...

wonderful blog and good work

bookmark us at

free forex books

Anonymous said...

Thanks a lot for writing this, it was unbelieveably informative and told me a ton.

Anonymous said...

حلوة موقع ويب ، لم أكن قد تأتي عبر بلوق الخاص بك من قبل في عمليات البحث بلدي! حمل على عمل رائع!.