Wednesday, August 16, 2006

مناجاة

يا نجمتى فى ضلام الليل دلينى
امتى يهل الصباح والفجر لما يبان
يهدى الحيارى ويفتح للأمل بيبان
وتدور سواقى المحبة
تروى عطاش الأحبة
وقلبى مركب شراعه وشرعته الانسان
***
وانتى على الشط واقفة
يام النهود الطهارة
يام العيون الجسارة
والقلب نبع الحنان
***
مدى حبال السلب دا البحر عالى الطوف
مدى الأيادى وعدى من جبال الخوف
خللى النهار ربان
غنى ياللى أمان
***
يا ليلى آه يا عين
ياليل يابو جناحين
يا مجمع القلبين
فى الليل فى زنزانه
ياليلى آخ يانه
دا الليل عليه طويل
بيفرفط المواويل
ويا صفير القطر
***
( يا وابور الساعة اتناشر
يامقبل عالصعيد
سلملى عالحبايب
يا بو عجل حديد )
***
تسهر حبيبتى ف عيونى
والحنين سهران
نحكى حكاوى الهوى
ويا غنا الكروان
لما الصباح يصبح
***
يا ناجى سيبنى أنام
وانت يا عم امام
يا منادى عا الجلسة
لسة يادوب لسة
***
يا طالعين البراح
حبى معاكو راح
أمانة منكم أمانة
تبلغوه السلام
وتجيبو منه علامة
***
يا حبيبى باستناك
ونبض قلبي محبة
وفاتح لك الشباك
يوماتى بعد التمام
سجن الحضرة

3 comments:

Anonymous said...
This comment has been removed by a blog administrator.
Anonymous said...

You have an outstanding good and well structured site. I enjoyed browsing through it » »

salam said...

سلام و إحترم
أرجو إرسال بريدك الإلكتروني
علي بريدي التالي
msam100@hotmail.com